கணிணியில் இருந்தபடியே குர்ஆன் ஓத...


கணிணியில் இருந்தபடியே குர்ஆன் ஓத

தினந்தோறும் திருமறை குர்ஆனின் சில பக்கங்களையாவது ஓதுவது உங்கள் வழக்கம் தானே! அல்ஹம்துலில்லாஹ். அப்படியானால் இதற்காக நீங்கள் சிரமப்பட வேண்டாம்.

இணையத்தில் இருந்தபடியே கீழ்க்காணும் சுட்டியைச் சொடுக்குங்கள். அழகான வடிவமைப்பில் அற்புதத் திருமறை குர்ஆன் பக்கம் பக்கமாக விரிந்து உங்களை வியக்க வைக்கும். ஃபிளாஷ் வடிவில் வடிவமைக்கப்பட்டுள்ள திருக்குர்ஆன் உங்கள் இதயத்தைக் கொள்ளை கொள்ளும்.

நீங்கள் விரும்பிய அத்தியாயத்தையோ, விரும்பிய பாகத்தையோ தேர்ந்தெடுத்து விருப்பப்படி ஓதலாம்.

இடது பக்க மூலையில் அம்புக்குறி செல்லும் இடத்தில் மவுஸை வைத்து வலப்பக்கமாக நகர்த்துங்கள், பக்கம் பக்கமாக விரியும்.

வலப்பக்க மூலையில் காணப்படும் கட்டத்தில் வேண்டிய பக்க எண்ணை இடுங்கள் குறிப்பிட்ட பக்கம் திறக்கும்.

more options பகுதியை கிளிக்குங்கள் 30 பாகங்களையும் விரிவாகக் காணலாம். குறிப்பிட்ட பாகத்தைக் கிளிக்குங்கள். அந்த பாகத்தை மட்டும் ஓதலாம்.

show all chapters ஐ கிளிக்குங்கள், 114 அத்தியாயங்களும் தனித்தனியே தெரியும்.

இன்னும் ஏராளமான வசதிகள் செய்யப்பட்டுள்ளன.

எழிலுற வடிவமைத்த இறை நேசரை வாழ்த்துவோம்.

அற்புதத் திருமறையின் அழகிய வடிவமைப்பைக் காண இங்கே சொடுக்குங்கள்.

 

 


கொலெஸ்ட்ரோல் என்பது என்ன?

1)மொத்த கொலெஸ்ட்ரோலின் இயல்பான அளவு:
 
    200 mg/dl க்கும் குறைவாக (5.2 mmol/L க்கும் குறைவாக)
 
2) LDL (தீய)கொலெஸ்ட்ரோலின் இயல்பான அளவு:
 
    130 mg/dl க்கும் குறைவாக (3.37 mmol/L க்கும் குறைவாக)
 
3) HDL (நல்ல) கொலெஸ்ட்ரோலின் இயல்பான அளவு:
 
    ஆண்கள் : 40-50 mg/dl க்கும் குறைவாக (1.0-1.28 mmol/L க்கும் குறைவாக)
 
    பெண்கள் : 50-60 mg/dl க்கும் குறைவாக (1.28-1.54 mmol/L க்கும் குறைவாக)
 
4) டிரிக்ளைஸெரைட்ஸின் இயல்பான அளவு :
 
    150 mg/dl க்கும் குறைவாக (1.69 mmol/L க்கும் குறைவாக
 
 
 
 
    கொலெஸ்ட்ரோல் என்பது என்ன?
 
    கொலெஸ்ட்ரோல் (Cholestrol) என்பது வெண்மை நிறத்திலான மெழுகு போன்ற,    கொழுப்பு வகையைச் சேர்ந்த ஒரு பொருளாகும்.இது உடலின் வளர்சிதை மாற்றத்தில் மிகவும் அவசியமான ஒன்றாகும். இன்னும் பல்வேறு முக்கியமான ஹார்மோன்கள்(காட்டாக எஸ்ட்ரோஜென் பித்த நீர், வைட்டமின் D போன்ற உடலின் பல்வேறு முக்கியச் செயல்பாடுகளில் பங்கு வகிக்கும்     புரதச் சத்துகள் மற்றும் திரவங்களின் தயாரிப்பிற்கு மிகவும் உதவிகரமானதாகும்.
 
    கொலெஸ்ட்ரோலை உடல் எங்கிருந்து பெறுகிறது?
 
    கொலெஸ்ட்ரோலை நமது உடல் பொதுவாக இரண்டு விதங்களில் பெறுகிறது.
 
    முதலாவதாக, நமது உடல் கொலெஸ்ட்ரோலைத் தன்னிலிருந்தே உற்பத்தி செய்து கொள்கிறது.
    நமது உடலுறுப்புகளுள் ஒன்றான கல்லீரல் நாளொன்றுக்குச் சுமார் 1000மில்லிகிராம்கள் வரை  கொலெஸ்ட்ரோலை உற்பத்தி செய்கிறது.இரண்டாவதாக நாம் உட்கொள்ளும் உணவு வகைகளான    முட்டைக் கரு, மாமிசம், கோழியிறைச்சி,பால் மற்றும் பால் தயாரிப்புகளிருந்து கொலெஸ்ட்ரோல் உற்பத்தியாகிறது.பழங்கள் காய்கறிகள், தானியங்கள் பருப்புகள் மற்றும் விதைகள் போன்ற தாவர உணவுகளில் கொலெஸ்ட்ரோல் இல்லை.
உடலில் உள்ள பல்வேறு விதமான கொழுப்புச் சத்துகள்:
    நமது உடலில் ஓடும் இரத்தத்தில் 'கொலெஸ்ட்ரால்' மற்றும் 'டிரைகிளிஸெரைட்ஸ்'
   (Triglycerides) ஆகிய இரண்டு விதமான கொழுப்புகள் உள்ளன.டிரைகிளிஸெரைட்ஸ் என்பது
    கல்லீரலால் தயாரிக்கப்படும் ஒருவிதக் கொழுப்பே! இது நம்முடைய அன்றாடச் செயல்பாட்டிற்குத்
    தேவையான சக்தியை உடலுக்கு வழங்குகின்றது.கொலெஸ்ட்ரோலைப் போலவே இரத்தத்தில்
    டிரைகிளிசெரைடுகள் அதிக அளவில் இருந்தாலும் இருதய நோய்களின் அபாயத்தை அதிகப் படுத்திவிடும்.
    கொலெஸ்ட்ரோல் புரதங்களுடன் இணைந்து ஒரு லிபொப்ரொடீன் ஆகி, அதன் மூலம் உடல் முழுவதும் பயணிக்கிறது.
    லிபோபுரோட்டீன்கள் என்பவை இரண்டு வகைகளாகும்.அவை:
 
 
   1. குறைந்த அடர்த்தியுள்ள (Low density) லிபோப்ரோட்டின் (LDL)
 
   2. அதிக அடர்த்தியுள்ள (High density) லிபோபுரோட்டின் (HDL) 
    அடர்த்திக் குறைவான லிபோபுரோட்டீன் (LDL):இது 'தீய கொலெஸ்ட்ரோல்' என்று குறிப்பிடப்படுகிறது.
    ஏனெனில், இந்த (LDL) அதிக அளவில் இரத்த ஓட்டத்தில் கலந்து செல்லும்போது, இருதயத்திற்கும்
    மூளைக்கும் செலுத்தப்படும் இரத்தக் குழாய்களின் சுவரில் கொஞ்சம் கொஞ்சமாக ஒட்டிக் கொண்டு கொழுப்புக் கோடுகளை உற்பத்தி செய்து விடுகிறது. இந்தக் கொழுப்பு கோடுகள் நாளடைவில் அதிகமதிகம் சேர்ந்து  உயரத்திலும் அகலத்திலும் பெருத்த நாறுகளாலான தடுப்புப் பலகைகளைப்போல் மாறிவிடுகின்றன. காலப் போக்கில் இவற்றின் அளவு மேலும் அதிகரிப்பதன் மூலம் இருதயத்தின் பகுதிகளுக்குச் செலுத்தப்படும் இரத்த ஓட்ட வேகத்தைத் தடுத்துவிடுவதனால் மாரடைப்பு (Heart attack) ஏற்படலாம்.
    மூளைக்குச் செலுத்தப்படும் இரத்த ஓட்டத்தில் தடை ஏற்பட்டால் பக்கவாத நோயால் தாக்குதலுக்குள்ளாகலாம்.
 
    அடர்த்திமிகு லிபோபுரோட்டீன் (HDL):
    இது 'நல்ல கொலெஸ்ட்ரோல்' என்று குறிப்பிடப்படுகிறது. ஏனெனில் இது இரத்தத்திலிருந்து அதிக அளவிலான  கொலெஸ்ட்ரோலை தமனியிலிருந்து அகற்றியபின் கல்லீரலுக்குக் கொண்டு செல்கிறது. இரத்தத்திலிருந்து அதிக  அளவிலான கொலெஸ்டொரோலை இவ்வாறு அகற்றுவதவன் மூலம் மாரடைப்பு, பக்கவாதம் போன்ற நோய்களின் தாக்குதலிலிருந்து இது நம்மைப் பாதுகாக்கிறது.அதிக அளவான கொலெஸ்ட்ரோல் எவ்வாறு இருதய நோய்களுக்கு காரணமாகிறது?
    நமது உடல் தனக்குத் தேவையான அளவில் கொலெஸ்ட்ரோலைக் கல்லீரலின் இயக்கம் மூலம் தயாரித்துக் கொள்கிறது.
    ஆனால் ஒரு சில ஆண்டுகளுக்குப் பின்னர், நாம் மாமிச உணவுகள் உட்கொள்வதன் மூலம் தேவைக்கு அதிகமான  அளவில் கொலெஸ்ட்ரோல் உருவாகி, அது இரத்த, தமனிக் குழாய்களின் சுவரில் ஒட்டிக் கொள்ளும் தடுப்புப் பலகைகளைப்போல் தங்கிவிடுகிறது. மேலும் இவை சிறிது சிறிதாகச் சேர்ந்து அளவை அதிகப்படுத்தும் வகையில் வளர்வதன் காரணமாக இருதயத்திற்கு இரத்தத்தைக் கொண்டு செல்லும் தமனிக் குழாய்களின் உள் சுற்றளவைக் குறுக்கி விடுகின்றது.
    இதன் விளைவாகத் தனக்குத் தேவைப் படும் அளவை விடக் குறைவான இரத்தத்தை நமது இருதயம் பெறுகிறது.
    இரத்தம் நம் உடலில் பயணிக்கும்போது தன்னுடன் இருதயத்திற்குத் தேவையான 'ஆக்ஸிஜன்' (Oxygen) எனும்  உயிர்வளியையும் கொண்டு செல்கிறது.நல்ல அளவிலான ஆக்ஸிஜன் கொண்ட இரத்தம் இருதயத்திற்குச் செல்ல  இயலவில்லையெனில், 'ஆன்கினா' Angina எனும் நெஞ்சு வலி ஏற்படலாம்.தொடர்ந்து இருதயத்தின் பகுதிகளுக்கு இரத்தம் செலுத்தப்படுவது துண்டிக்கப்பட்டால் அதன் விளைவாகவே heart attack எனும் மாரடைப்பு ஏற்படுகிறது.
    சில நேரங்களில் இந்தக் கொழுப்புச் சில்லுகள் இடம் பெயர்ந்து கட்டிகளாக இரத்தக் குழாய் தமனிகளில் இரத்த ஓட்டத்தில் தடையை ஏற்படுத்திவிடுவதும் உண்டு.  அதன் விளைவாக நெஞ்சுவலி அல்லது மாரடைப்பு ஏற்படுகிறது. அளவைவிட அதிகமான கொலெஸ்ட்ரோலின் விளைவாக  சீறுநீரகச் செயலிழப்பு (Kidney failure)உட்பட டெமென்ஷியா போன்ற நோய்கள் ஏற்படும் அபாயம் அதிகரிக்கிறது.
 
    கொலெஸ்ட்ரோல் அளவை இரத்தத்தில் அதிகப்படுத்துபவை யாவை?
 
    பல்வேறு காரணிகள் இரத்தத்தில் கொலெஸ்ட்ரோல் அளவை அதிகப்படுத்துகின்றன :
 
  - அதிக அளவிலான கொழுப்புகள் கலந்த உணவுப் பழக்கம்
  - அதீத உடற்பருமன் (Obesity)
  - உடல் இயக்கக் குறைவான பணிகள்
  - புகைப் பழக்கம்
  - மன அழுத்தங்கள்
  - மதுப் பழக்கம்
  - சக்கரைநோய், சிறுநீரகம் மற்றும் தைராய்டு சுரப்பி நோய்கள்
  - கருத்தடை மாத்திரைகள் உட்கொள்தல்
  - வயோதிகம்
  - பாலியல் காரணங்கள் (பெண்கள் குழந்தை பெறும் பருவத்தில் குறைந்த கொலெஸ்ட்ரோல் அளவினைப் பெற்றிருப்பர்).
  - தலைமுறை
 
    இரத்தத்தில் அதிக அளவில் கொலெஸ்ட்ரோல் இருப்பதன் அறிகுறிகள் என்ன?
    பொதுவாக இரத்தத்தில் அதிக அளவில் கொலெஸ்ட்ரோல் இருப்பதற்கான எந்த ஓர் அறிகுறியையும் அது ஏற்படுத்துவதில்லை; ஆகையால்தான் அது "அமைதியான உயிர்க்கொல்லி"என்று அறியப்படுகிறது.
 
    இரத்தத்தில் உள்ள கொலெஸ்ட்ரோலை எவ்வாறு கணக்கிடுவது?
 
    இளைஞர்களும் வயதானவர்களும் தங்கள் இரத்தத்தில் உள்ள கொலெஸ்ட்ரோல் அளவைப் பரிசோதித்துக் கொள்ள வேண்டும். இரத்தத்தில் உள்ள கொலெஸ்ட்ரோல் அளவு என்பது, 12 மணி நேரம் ஏதும் உட்கொள்ளாத நிலையில் காலையில் எடுக்கப்பட்ட மாதிரி (sample) இரத்தத்திலிருந்து கணக்கிடப்படுகிறது. அதிலும் 'லிபோபுரோட்டீன் ப்ரொஃபைல்' (lipoprotein profile) எனும் இரத்தப் பரிசோதனை செய்வது மிகவும் சிறந்தது.
    இப்பரிசோதனை மூலம் :
 
இரத்தத்திலுள்ள மொத்த கொலெஸ்ட்ரோல் 
   LDL (தீய) கொலெஸ்ட்ரோல் 
   HDL (நல்ல) கொலெஸ்ட்ரோல்  
டிரிக்ளைஸெரைட்ஸ் 
     ஆகியவற்றின் விபரங்களை அறியலாம்.
 
     நல்ல ஆரோக்கியமான நிலையான கொலெஸ்ட்ரோல் மற்றும் ட்ரிக்ளைஸெரைட்ஸ் அளவுகள் எவை?
 
    1) மொத்த கொலெஸ்ட்ரோலின் இயல்பான அளவு:
 
    200 mg/dl க்கும் குறைவாக (5.2 mmol/L க்கும் குறைவாக)
 
    2) LDL (தீய)கொலெஸ்ட்ரோலின் இயல்பான அளவு:
 
    130 mg/dl க்கும் குறைவாக (3.37 mmol/L க்கும் குறைவாக)
 
    3) HDL (நல்ல) கொலெஸ்ட்ரோலின் இயல்பான அளவு:
 
      ஆண்கள் : 40-50 mg/dl க்கும் குறைவாக (1.0-1.28 mmol/L க்கும் குறைவாக)
 
      பெண்கள் : 50-60 mg/dl க்கும் குறைவாக (1.28-1.54 mmol/L க்கும் குறைவாக)
 
    4) டிரிக்ளைஸெரைட்ஸின் இயல்பான அளவு :
 
    150 mg/dl க்கும் குறைவாக (1.69 mmol/L க்கும் குறைவாக)
 
      முக்கியமாக இரண்டு விதமான அளவுகோல்கள் மூலம் கொலெஸ்ட்ரோல் அளவு கணக்கிடப்படுகின்றது என்பதை  இங்கு கவனத்தில் கொள்ள வேண்டும்.முதல் விதம், எடையின் அடிப்படையில். அதாவது ஒரு டெசி லிட்டரில்  உள்ள மில்லி கிராம் (mg/dl) எண்ணிக்கையளவு முறை. இன்னொன்று,மூலக்கூறு எண்ணிக்கையளவு   (molecular count) அதாவது ஒரு லிட்டரில் உள்ள மில்லிமோல்கள் (mmol/L) முறை.
      உங்களது கொலெஸ்ட்ரோல் பரிசோதனை முடிவை நீங்கள் புரிந்து கொள்வதற்கும் குறிப்பிட்டுச் சொல்வதற்கும் இந்த இரு விதங்களில் எவ்விதத்தில் உங்கள் கொலெஸ்ட்ரோல் அளவு கணக்கிடப்பட்டது என்பதைத்  தெரிந்து வைத்திருக்க வேண்டும்.
 
 
     நாம் உட்கொள்ளும் உணவில் உள்ள கொழுப்புச் சத்து வகைகள் (Fats) யாவை?
     திடக் கொழுப்புகள் (saturated):    முக்கியமாக, மாமிச உணவு வகையில் இருந்து திடக் கொழுப்பு வகைகள் கிடைக்கின்றன. தேங்காய் எண்ணெயிலும் பாமாயிலி(Palm oil)லும் அதிக அளவிலான திடக் கொழுப்புகள் உள்ளன.  இந்த வகை திடக் கொழுப்புகள்தாம் 'தீய' (LDL) கொலெஸ்ட்ரொலை இரத்தத்தில் அதிகப் படுத்தி, தமனிக் குழாய்களின் உட்சுற்றளவைக் குறுக செய்கிறது;அடைப்புகளையும் ஏற்படுத்துகிறது.
     திடக் கொழுப்புகளை உள்ளடக்கிய உணவு வகைகள் : பால், வெண்ணெய், இறைச்சி, பாமாயில், தேங்காய் எண்ணெய்,  தாவர நெய்.
திரவக் கொழுப்புகள்    (1) (polyunsaturated) :
     எண்ணெய், விதை மற்றும் தானிய உணவுப் பொருட்களிலிருந்து  திரவக் கொழுப்புகள் உருவாகின்றன. திரவக் கொழுப்புகள் LDL எனும் தீய கொலெஸ்ட்ரோலை இரத்தத்திலிருந்து      குறைத்து, இருதயத்திற்கு நலம் விளைவிக்கக் கூடியவை. ஆயினும், திரவக் கொழுப்புகள் நம் இரத்தத்தில்  கூடிவிட்டாலும் அவை HDL எனும் நல்ல கொலெஸ்ட்ரோலைக் குறைத்து விடக்கூடும். ஆகையால் கீழ்க்காணும் திரவக் கொழுப்பு வகைகளை அதிகமாகவுமில்லாமல் குறைவாகவுமில்லாமல் நடுநிலை அளவிலேயே உட்கொள்ள வேண்டும்.
     திரவக் கொழுப்புகளை உள்ளடக்கிய எண்ணெய் உணவு வகைகள் : சோள எண்ணெய் (Corn oil),
     சூரியகாந்திப்பூ எண்ணெய் (Sunflower oil),ஸாஃப்பூ (Safflower) எண்ணெய், ஸோயாபீன் எண்ணெய் (Soya been oil).
 
     திரவக் கொழுப்புகள் (2) Monounsaturated:
     மோனோஅன்ஸேடுரேடெட் எனும் திரவக் கொழுப்புகள் தானிய வகைகளில் அதிகம் கிடைக்கின்றன.  பொலிஅன்ஸேடுரேடெட் கொழுப்பு வகைகள் பேன்றே மொனோஅன்ஸேடுரேடெட்
     கொழுப்புகளும் இருதயத்திற்கு நலம் விளைவிக்கக் கூடியவையாகும். ஏனெனில் அவை நம் இரத்தத்திலுள்ள LDL எனும் தீய கொலெஸ்ட்ரோலை குறைத்து HDL எனும் நல்ல கொலெஸ்ட்ரோலை அதிகரிக்கச் செய்கின்றன. ஆயினும் இவற்றையும் ஒரு குறிப்பிட்ட அளவில்தான் உட்கொள்ளவேண்டும்.திரவக் கொழுப்புகளை உள்ளடக்கிய எண்ணெய்/தானிய உணவு வகைகள் : ஓலிவம் எனும் ஜைத்தூன் எண்ணெய், கனோலா canola எண்ணெய், பாதாம், முந்திரி,வேர்கடலை, பிஸ்தா பருப்பு போன்றவை.
 
அமிலக் கொழுப்பு:
     ஒமேகா-3 (Omega 3 acids) எனும் கொழுப்பு அமிலங்கள் இன்னொரு வகை பொலிஅன்ஸேடுரேடெட் கொழுப்புவகை ஆகும். இவை முக்கியமாக மீன் எண்ணெயில் கிடைக்கின்றன.இவையும் இருதய நோய்கள் உருவாவதைக் குறைப்பவையாகும்.
     அமிலக் கொழுப்பு மீன் வகைகள் : TUNA (ஐலா/கும்பலா) KING FISH (வஞ்சிரம்/ஐகுரா), SALMON கெண்டை,    SARDINES சூடை/மத்தி போன்ற மீன்கள்.
  நீரகக் கொழுப்பு (Hydrogenated) :
     பொலிஅன்ஸெடுரேடெட் அல்லது மொனொ அன்ஸேடுரேடெட் கொழுப்புகளுடன் கலந்து நீரகக் கொழுப்பு தயாரிக்கப்படுகிறது. இதன் மூலம் நீரகக் கொழுப்பு,திடநிலைக்கு மாற்றம் பெறுகிறது. இந்த முறை மூலம் அன்ஸேடுரேடெட் கொழுப்புகளை ஸேடுரேடெட் கொழுப்புகளாக அது மாற்றுகிறது. அவசர (fast food) உணவுகளில் நீரகக் கொழுப்பு உபயோகிக்கப் படுகின்றது.
 
     சமையல் எண்ணெய்களுள் எது உடல் நலத்திற்கு சிறந்தது?
     கனோலா எண்ணெயில் அதிக அளவில் மொனொஸெடுரேடெட் கொழுப்பு உள்ளது. சோள எண்ணெய், சூரியகாந்திப்பூ (Sun flower) எண்ணெய், ஸஃப்போலாப்பூ (Saffola) எண்ணெய் மற்றும்      ஸோயாபீன் (Soya bean)எண்ணெய்களில் அதிக அளவில் பொலி அன்ஸெடுரேடெட் கொழுப்பு உள்ளது.
  'கொலெஸ்ட்ரோல்' அளவைக் கட்டுப்படுத்த என்ன செய்ய வேண்டும்?
     கீழ்கண்டவற்றை முறையாகக் கடைபிடிப்பது, நமது இரத்தத்தில் உள்ள கொலெஸ்ட்ரோல் அளவைக் கட்டுபாட்டில் வைக்கைவும் இருதய நோய்கள் ஏற்படும் வாய்ப்புக் குறைக்கவும் உதவியாக இருக்கும்.   
சரியான உணவைத் தேர்ந்தெடுத்தல்:
     ஸேடுரேடெட் கொழுப்பு அதிகம் உள்ள உணவைத் தவிர்க்க வேண்டும்
     மாமிசத்திலுள்ள தோல்கள் மற்றும் கொழுப்பை, சமைப்பதற்கு முன்னர் நீக்கிவிட வேண்டும்
     வாரமிருமுறையேனும் மீன் உண்ண வேண்டும்
     எண்ணெய்யில் பொறித்துண்ணும் உணவுகளை, பொறிப்பதற்கு பதிலாக வேகவைத்ததோ, சுட்டோ, வதக்கியோ சாப்பிடப் பழக வேண்டும்.மொனொஅன்ஸெடுரேடுட் எண்ணெய் மற்றும் பொலி அன்ஸேடுரேடெட் எண்ணெய்கள்,  சமையலில் உபயோகிக்க வேண்டும். அவற்றையும் குறைந்த அளவில்தான் உபயோகிக்க வேண்டும்.
     கொழுப்பு நீக்கிய பால் (skimmed milk) அல்லது குறைந்த கொழுப்புள்ள பால் (low fat milk),
     வெண்ணெய் மற்றும் தயிரை உபயோகிக்க வேண்டும்.டோனட்ஸ் (Dough nuts), மஃப்பின்ஸ்(muffins) போன்ற pastry பாஸ்ட்ரி வகை துரித உணவு(fast food)களைத் தவிர்க்க வேண்டும்.
     பழவகைகள், காய்கறிகள், பருப்புகள், தானியங்கள், ரொட்டி, அரிசி மற்றும் பாஸ்டா உணவுகள் உண்ண வேண்டும். வெண்ணையைத் தவிர்த்து, திரவநிலையிலான மார்கரின் பயன்படுத்தலாம்.
     முட்டையின் மஞ்சட்கருப் பகுதியை உண்பதைத் தவிர்க்க வேண்டும். உணவுப் பொருட்களில் உள்ளக் கொழுப்பின் அளவை, அவற்றின் குறிப்பேட்டைப் படித்துத் தெரிந்து கொள்ளவது கூடுதலாக உள்ளக் கொழுப்புணவைத் தவிர்க்க உதவும்.
     இனிப்புணவுகளைக் குறைத்துக் கொள்ள வேண்டும்.
 
    தவறாத உடற் பயிற்சி:
    ஒவ்வொருவரும் போதிய உடல் அசைவு ஏற்படும் வகையிலான பயிற்சிகளில் ஈடுபடுவது நல்லது.
    அதனால் நல்ல கொலெஸ்ட்ரோல் (HDL) அதிகரிக்கும்;தீய கொலெஸ்ட்ரோல் (LDL) குறையும்;
    அளவுக்கு அதிகமான உடலின் எடையைக் குறைக்கவும் உதவும்.உடற் பயிற்சியை மெதுவாகத் துவக்கி, பின்னர் கொஞ்சம் கொஞ்சமாக அதிகரிக்க வேண்டும். தினமும் தொடர்ந்து உடற் பயிற்சி செய்வதைக்  குறிக்கோளாகவே கொள்ள வேண்டும்.தினமும் முப்பது நிமிடங்களாவது உடலசைவுடைய பயிற்சிகளைச் செயல்படுத்த திட்டமிட்டுக் கொள்ள வேண்டும். அவை நடுத்தரமான பயிற்சிகளாக இருத்தல் வேண்டும்.
    அந்தப் பயிற்சிகள், நாம் சாதாரணமாக சுவாசிப்பதைவிட சற்று வேகமாக நம்மை சுவாசிக்கச் செய்ய வேண்டும்.
    உதாரணமாக வேகமாக நடக்கும்போது மூச்சு ஏறுவதைப்போல்.அதே நேரம் மிகவும் அதிகமாக மூச்சுத் திணரும்  வகையிலும் இருக்கக் கூடாது. நம்மால் பேச இயலும் விதத்தில் இருக்க வேண்டும்.பயிற்சிகள் ஒரே நேரத்தில்  தொடர்ந்து 30 நிமிடங்களுக்கு இருக்க வேண்டியது அவசியமில்லை. ஒரு நாளில் ஒன்றுக்கு மேல் பல முறைகள் - அதாவது இரண்டு மூன்று முறைகள் செய்யலாம். ஒவ்வொரு முறைக்குப் பத்து-பத்து  நிமிடங்கள் வீதம் என்றும் செய்யலாம். ஆனால் குறைந்த பட்சம் ஒரு முறைக்குப் 10 நிமிடங்களாவது பயிற்சி செய்ய முயல வேண்டும்.
 
    நமக்கு விருப்பமான பயிற்சிகளைத் தேர்ந்தெடுக்க வேண்டும். அதைச் செய்யும்போது சலிப்பு ஏற்படாத விதத்தில் இருக்க வேண்டும்.
    கொலஸ்ட்ரோலைக் குறைப்பதற்கான சிறந்த பயிற்சிச் செயல்கள் நம் கால்(களின் நரம்பு)களை உபயோகிக்கக் கூடியதே.
    கால் நரம்புகள் வேகமாகச் செயல்படும்போது, நமக்கு அதிகமான அளவில் ஆக்ஸிஜென்(Oxygen) தேவை ஏற்படுகிறது, ஆகையால் இருதயம் வேகமாக இயங்கி இதை நிறைவு செய்கிறது. அவ்வாறு செயல்படுவதால் இருதயம் உறுதியாகி, மிகவும் சீரான முறையில் இயங்க வழி பிறக்கிறது. உதாரணம் சைக்கிள் ஓட்டுதல், நடைப் பயிற்சி செய்தல் போன்றவை.
    எந்த உடற்பயிற்சியையும் தொடங்கும் முன் மருத்துவரைச் சந்தித்து ஆலோசனை பெறுவது நல்லது.
    புகைப் பழக்கத்தைக் கைவிடுதல்:
 
    புகைப் பழக்கம் இருதய நோய்கள் மற்றும் இதர கேடுகளின் அபாயத்தை இரட்டிக்கச் செய்கிறது. இது நல்ல  கொலெஸ்ட்ரொலை (HDL) குறைக்கிறது.தீய கொலெஸ்ட்ரொலை (LDL) அதிகரிக்கிறது. புகைபிடித்தல் நுரையீரல்  புற்று நோய் (lung cancer) ஏற்படும் அபாயத்தையும் அதிகரிக்கிறது.இவற்றையெல்லாம் தவிர்க்க  ஒரே ஒரு வழிதான் உள்ளது. அதுதான் புகைப் பழக்கத்தை முழுமையாகக் கைவிடுதல்.தாம் புகைக்காவிடினும்  புகைப்பவர்கள் புகைக்கும் புகையை சுவாசிக்கும் மறைமுகப் புகைபிடித்தல் (Passive smoking) என்பதும்
    உடலுக்கு ஆபத்து விளைவிக்கக் கூடியதே.குறிப்பாக, பெரியவர்கள் புகைபிடிக்கும் பழக்கத்தினால் குழந்தைகள்  இந்தப் பாதிப்புக்கு ஆளாகி, பல்வேறு நோய்களால் தாக்கப்படுகின்றனர். இருமல், நிமோனியா மற்றும்
    ஆஸ்துமா போன்ற நோய்கள் ஏற்படும் சாத்தியங்களுடன் வாலிபப் பருவத்தைத் தாண்டியவுடன் இருதய நோய்களின்  தாக்குதல் அபாயமும் உள்ளது.புகைக்கும் பழக்கமுடைய பெண்கள், அல்லது மறைமுகப் புகைபிடித்தல் சூழலுக்கு ஆளாகும் பெண்கள் கருச்சிதைவு, குறைப்பிரசவம்,குறைந்த எடைக் குழந்தைகள் பெறும் அபாயம் போன்றவற்றுக்கு உள்ளாகிறார்கள்.
    புகைப் பழக்கம் உள்ளவர்கள், தங்கள் உடல்நல ஆலோசகரை(குடும்ப மருத்துவரை)ச் சந்தித்து, புகைத்தலை நிறுத்திடும் ஆலோசனைத் திட்டத்தைப் பெற்றுப் பயனடைந்து கொள்ளவது சாலச் சிறந்தது.  புகைப் பழக்கம் உள்ளவர்கள், அதைக் கைவிடுவது என்பது ஒன்றுதான் அவர்களது உடல் நலத்தைப் பாதுகாக்கும்  வழியில் அவர்கள் எடுக்கும் முக்கியத் தீர்வாகும்.
 
    மன அழுத்தத்தைக் (stress) கட்டுப்படுத்துதல்:
 
    மன அழுத்தம் என்பது காலப்போக்கில் கொலெஸ்ட்ரோல் அளவினைக் கூட்டுவதாகக் கண்டு பிடிக்கப் பட்டுள்ளது. மன அழுத்தம் என்பது நம் அன்றாட வாழ்க்கையில் தாக்கத்தையும் பாதிப்பையும் ஏற்படுத்தி விடுகிறது. உதாரணமாக, சிலர் மன அழுத்தத்தில் இருக்கும்போது தங்கள் மனதை நிலைப்படுத்திட கொழுப்புகள் கலந்துள்ள நொறுக்குத்தீனி கொறிக்கும் பழக்கத்திற்கு ஆளாகி விடுகின்றனர்.  அவற்றில் உள்ள அதிக அளவிலான திடமான (saturated fats) கொழுப்புகள் கொலெஸ்ட்ரோல் அளவை அதிகரிக்கச் செய்துவிடுகிறது.மருத்துவம் கொலெஸ்ட்ரோலைப் போதிய அளவு குறைத்திட மேற்கண்ட வழிகள் கொடுக்கப் பட்டுள்ளன. இங்குக் கூறப்பட்ட உணவுப் பழக்க வழக்கங்கள் மற்றும் வழிகாட்டும் விஷயங்களை முறையாகக் கடைப்பிடித்து வந்தால் கொலெஸ்ட்ரோல் அளவைக் கட்டுப்பாட்டில் வைக்க எளிதாக இருக்கும்.
    இவற்றுள் எதுவும் பயனளிக்காத நிலையில் உள்ளவர்கள், தகுந்த மருத்துவரை அணுக வேண்டும். அவருடைய ஆலோசனையில் மாற்றமின்றி அவர் தருகின்ற மருந்துகளை அதே அளவில் உட்கொள்ள வேண்டும். இதில் கவனமாக இருக்க வேண்டும்.
 
    உணவு வகையில் உள்ள கொலெஸ்ட்ரோல் அளவு அட்டவணை
 
    உணவு வகைகள் கொலெஸ்ட்ரோல் (mg /100gm)
 
மூளை   -   2000 (mg /100gm)
முட்டை (வெண்கரு+மஞ்சட்கரு) - 550 (mg /100gm)
 
சிறுநீரகம் (Kidney)      -   375 (mg /100gm)
 
கல்லீரல் (Liver)      - 300 (mg /100gm)
 
வெண்ணெய்  - 250 (mg /100gm)
சிப்பி மீன் (Oyster)             200 (mg /100gm)
லோப்ஸ்டெர்      200 (mg /100gm)
இறால் (Shrimp)              170(mg /100gm)
இருதயம் - 150(mg /100gm)
 
மாட்டு இறைச்சி  75 (mg /100gm)
இளம் ஆட்டிறைச்சி (Lamb)  70 (mg /100gm)
ஆட்டிறைச்சி (Mutton)   65 (mg /100gm)
கோழியிறைச்சி  62 (mg /100gm)
பாலாடைக் கட்டி (chedder cheese)          100 (mg /100gm)
குழைவான பாலாடைக்கட்டி (cheese Spread)   70 (mg /100gm)
பனீர் (cottage cheese)    5 (mg /100gm)
Margarine (2/3 விலங்கினக் கொழுப்பு, 1/3 தாவர கொழுப்பு) 65 (mg /100gm)
மயோனஸ் (1 மேசைக் கரண்டி) 10 (mg /100gm)
ஐஸ் கிரீம்    45 (mg /100gm)
நிறைக்கொழுப்புப் பால் (1 குவளை) 34 (mg /100gm)
நிறைக் கொழுப்புப் பால்பொடி (1 குவளை) 85 (mg /100gm)
கொழுப்பு நீக்கிய பால் (1 குவளை)  5 (mg /100gm)
பிரெட்     1 (mg /100gm)
ஸ்போஞ்ச் கேக்  130 (mg /100gm)
சாக்லேட் பால்  90 (mg /100gm)
 
    தேவையான அளவில் உள்ள கொலஸ்ட்ரால் எவ்வளவுக்கெவ்வளவு உடலுக்கு இன்றியமையாததாக உள்ளதோ அதேபோல அளவிற்கு மீறினால் உடல் நலத்திற்குக் கேடு விளைவிக்கக் கூடியதாகவும் உள்ளது.  எனவே அத்தகைய உடல்நலக் கேடுகளை விளைவிக்கும் காரணிகளாக இங்கு நாம் பட்டியலிட்டுள்ள  அதிக ஓய்வு, புகைப்பிடித்தல் போன்ற தீய பழக்க வழக்கங்களைத் தவிர்த்தும் நல்ல தேர்ந்த  உணவுப் பழக்க முறைகள்- உடற்பயிற்சிகளைப் பேணியும், கொலஸ்ட்ரால் மூலம் உருவாகும் தீங்குகளைத் தவிர்த்துக் கொள்வோம்!
 

துபாயில் கண்ட இடத்தில் துப்பினால்......


துபாய்: துபாய் நகரில் கண்ட இடங்களில் எச்சில் துப்புவோருக்கு கடும் அபராதம் விதிக்கப்படும். அசுத்தம் ஏற்படும் வகையில் துப்புவோருக்கு ரூ. 6000 அபராதம் விதிக்கப்படும். இதுகுறித்து பொது விழிப்புணர்வை ஏற்படுத்தும் பிரசாரத்தையும் துபாய் நிர்வாகம் தொடங்கியுள்ளது.

துபாய் நகரை சுத்தமாகவும், சுகாதாரமாகவும் வைத்துக் கொள்ள பல புதுத் திட்டங்களை துபாய் நிர்வாகம் மேற்கொண்டுள்ளது. அதன் ஒரு பகுதியாக பொது இடங்களில் கொஞ்சம் கூட பொறுப்பே இல்லாமல் புளிச் புளிச் என துப்புவோருக்கு கடும் அபராதம் விதிக்க முடிவு செய்யப்பட்டுள்ளது.

இப்படி துப்புவோருக்கு 500 திர்ஹாம் அபராதம் (நம்ம ஊர் மதிப்பில் ரூ. 6000) அபராதம் விதிக்கப்படும் என அறிவிக்கப்பட்டுள்ளது.

மேலும், கட்டடங்களின் பால்கனிகளில் துணிகளைக் காயப் போடுவது, குப்பைகளை போட்டு வைப்பது உள்ளிட்டவையும் தடை செய்யப்பட்டுள்ளது.

இதை விட முக்கியமாக வெற்றி, பாக்கு வியாபாரத்திற்கும் தடை விதிக்கப்பட்டுள்ளது. (இதை வாயில் போட்டு மென்று துப்புவதில் நம்ம ஆட்கள் ரொம்ப விசேஷமானவர்கள்)

இதுபோன்ற பொருட்களை விற்போருக்கு 5000 திர்ஹாம்கள் அபராதமாம். இதுபோன்ற பொருட்களின் விற்பனை குறித்த தகவலை தெரிவிப்போருக்கு 2000 திர்ஹாம்கள் பரிசாக அளிக்கப்படும்.

இதில் என்ன வேடிக்கை என்றால், வெற்றிலை, புகையிலை உள்ளிட்டவற்றை விற்பனை செய்வோரும், வாங்கிப் பயன்படுத்துவோரும் பெரும்பாலும் இந்தியர்கள்தானாம்.

துபாயில் பொழைக்கப் போனா பிரச்சனை இல்லை. துப்பினால் சிக்கல்தான்.


பாராக் ஒபாமா



பாராக் ஒபாமா இன்று உலகெங்கும் அறிமுகமான ஒரு பெயர், அமெரிக்க அதிபருக்கான ஓட்டத்தில் முன்னணியில் இருக்கும் ஒரு பெயர் மட்டுமன்றி, முன்னெப்போதும் இல்லாத அளவுக்கு அமெரிக்க மக்கள் ஆர்வமுடம் எதிர் நோக்கும் ஒரு இளைய வேட்பாளராகவும் இருக்கிறார். உலகப் பொருளாதாரம் மற்றும் அரசியலைத் தீர்மானிக்கும் ஒரு மிகப் பெரும் வல்லமை பொருந்திய நாட்டின் அடுத்த அதிபரைப் பற்றி நாமும் தெரிந்து கொள்ள வேண்டியது அவசியம் மட்டுமன்றி, உலக அரசியலின் கூறுகளை கொஞ்சம் கழுகுப் பார்வை கொள்வதற்குமான தேவையுமாகும்.

 

இளமைக் காலம்

ஆங்கிலக் காலனி அரசில், ஒரு அடிமை வேலை செய்த தாத்தா, கென்யாவில் பிறந்து ஆடுகளை மேய்த்து பிழைத்து வந்த ஒரு கிராமத்து விவசாயத் தந்தையின் மகன்தான் இன்று நாமெல்லாம், தெரிந்து கொள்ள ஆர்வமாக இருக்கும் பாராக் ஒபாமா.

ஹவாய்த் தீவுகளின் ஒரு சிறிய வாழிடத்தில், 1961 ஆம் ஆண்டு ஆகஸ்ட் 4 ஆம் நாள் பிறந்தார் இந்த உலக சரித்திரத்தில் நிரந்தர இடம் பிடிக்கப் போகும் இளைஞர், முதன் முதலில் பார்த்த வேலை ஆடு மேய்த்து தான். ஆம், தனது தந்தையாருடன் ஆடுகளை மேய்ப்பது அவற்றிற்கு உணவளிப்பது போன்ற வேலைகளைத் தான் படிக்கும் நேரம் போக எஞ்சியிருக்கும் நேரங்களில் செய்து வந்தார் ஒபாமா.பாராக் ஒபாமாவின் தந்தையார் பெயரும் பாராக் ஒபாமா தான், வழக்கம் போல அவரை " சீனியர் ஒபாமா" என்றும், மகனை "ஜூனியர் ஒபாமா" என்றும் அமெரிக்கா சொல்லத் துவங்கிவிட்டது.

ஜூனியர் ஒபாமாவின் தாயார், ஆன் டுன்காம் (ANN DUNHAM), கன்சாஸ் என்னும் சிற்றூரில் பிறந்து வளர்ந்தார், அவருடைய தந்தையார் ஒரு ராணுவ வீரராக ஐரோப்பிய நாடுகளில் இரண்டாம் உலகப் போரில் பங்கு பெற்றார், அந்த நேரம் தாயாரின் அரவணைப்பில் வளர்ந்த ஆன் அம்மையார், பின்னர் ஹவாய் பல்கலைக் கழகத்தில் பயின்றார், அங்கு கல்வியில் சிறந்த மாணவராக அப்போது விளங்கிய "சீனியர் ஒபாமாவை" காதலித்து மணம் புரிந்து கொண்டார் ஆன் அம்மையார், ஹவைப் பல்கலையில் கிடைத்த கல்விக்கான உதவித் தொகையும் ஊக்கமும், சீனியர் ஒபாமாவின் அமெரிக்கக் கனவுகளை நனவாக்கத் துவங்கியது.

காலப் போக்கில் கென்யாவிற்குத் திரும்பிய தந்தையாரைப் பிரிந்து, தாயாருடன் இந்தோனேசியாவில் சிறிது காலம் இருந்த " ஜூனியர் ஒபாமா" பின்னர் நியூயார்க் நகருக்கு வந்து தனது பட்டப் படிப்பை கொலம்பியா பல்கலைக் கழகத்தில் முடித்தார். இதனால் இவர் ஒரு ஆப்பிரிக்க, அமெரிக்க, ஆசிய மக்களின் வாழ்வியலை முழுதும் அறிந்த தலைவராகக் கருதப்படுகிறார்.

தனது சட்டப் படிப்பின் ஆர்வத்தை மூட்டை கட்டி வைத்து விட்டு, தனது தாயாரின் விருப்பத்திற்கு இணங்க, 1885 இல் சிகாகோ நகரத்து தேவாலயங்களில் ஊழியம் செய்யப் புறப்பட்ட "ஜூனியர் ஒபாமா" வேலையற்ற ஏழை மக்களிடையே சமூகப் பணிகளில் ஈடுபட்டார். அங்கே தான் ஒரு உண்மையை " ஜூனியர் ஒபாமா" கண்டு கொண்டார், உலகில் நிலவும் இது போன்ற சமூகச் சிக்கல்களை தீர்க்க வெறும் சேவை மட்டும் போதாது, அரசியல் மற்றும் சட்ட மாற்றங்கள் தான் சமூகச் சிக்கல்களை தீர்க்க உதவும் என்கிற அரசியல் ஆர்வம் மேலிட, ஹார்வர்ட் பலகலைக் கழகத்தில் 1991 ஆம் ஆண்டு சேர்ந்த " ஜூனியர் ஒபாமா", சட்டப் படிப்பை முடித்த பின்னர் " ஹர்வர்ட் சட்டக் குழுவின்" முதல் ஆப்பிரிக்க அமெரிக்கத் தலைவரானார். மீண்டும் சிகாகோ நகருக்குத் திரும்பிய ஒபாமா, ஒரு "சமூக உரிமைகளின்" வழக்குரைஞராக தனது பணிகளைத் துவக்கினார். சட்ட நுணுக்கங்களைக் கற்றுத் தரும் ஆசிரியராகவும் பகுதி நேரப் பணியாற்றிய ஒபாமா, அவரது அயராத மக்கள் பணியின் காரணமாக 1996 இல் இல்லினோய்ஸ் மாநில செநேட்டராகத் தேர்வு பெற்றார், பின்னர் 8 ஆண்டுகள் செநேட்டராகத் தனது பணிகளைச் செவ்வனே செய்த இவருக்கு அமெரிக்கப் பாராளுமன்றத்திற்கு செநேட்டராகும் வாய்ப்பு 2004 இல் வந்து சேர்ந்தது.

அரசியல் வாழ்க்கை

பல்வேறு வாழிடங்களில், பல்வேறு சமூகக் கலாச்சார முகங்களைக் கொண்ட மக்களோடு தனது வாழ்வை நகர்த்திய ஒபாமாவின், அரசியல் அறிவு மிகக் கூர்மையாக வளரத் துவங்கியது. அரசியலுக்கு அப்பாற்பட்டு அமெரிக்க மக்களை தம்மால் இணைக்க முடியும் என்று நம்பிக்கையோடு விவாதங்களை எதிர் கொள்கிறார் " ஜூனியர் ஒபாமா".

இல்லிநோய்சில் செநேட்டராக்ப் பணியாற்றிய போதே, வருமான வரிக் கடன் திட்டம், மற்றும் குழந்தைகளின் கல்வித் திட்டம் போன்றவைகளால் செல்வாக்குப் பெற்ற இவரது திட்டங்கள், ஆக்கிரமிப்பு மற்றும் நில ஆதிக்கக் கும்பலின் நிலையைத் தகர்த்த ஒபாமாவின் கடும் நடவடிக்கைகள் பலரது பாராட்டுக்கும் உரித்தானது. சட்டப் பூர்வமான நடவடிக்கைகளை இவர் மேற்கொண்ட போது, அதிகாரிகளை, வீடியோப் படம் எடுக்கச்சொல்லி ஆக்கிரமிப்பாளர்களின் வயிற்றில் புளியைக் கரைத்தார்.

குடிமக்கள், அனைவரும் வரிப் பணத்தின் செலவு விகிதம் என்ன என்பதை இணையத்தின் மூலம் நேரடியாகத் தெரிந்து கொள்ள வகை செய்ததின் மூலம், மக்களின் நம்பிக்கையை அரசு பெறுவதற்கு உதவியாக இருந்த ஒபாமா, ஊழலுக்கு எதிரான ஒரு போர்க்குரலாகவும் அமெரிக்க நாடாளுமன்றத்தில் ஒலித்தார்.

நாடாளுமன்ற அரசியல் பணிகள்

ஈராக் மற்றும் ஆப்கன் போரில் பாதிப்படைந்த இல்லினோய்ஸ் ராணுவ வீரர்களின் உதவித் தொகை மற்றும், மருத்துவச் செலவுகளை அரசிடம் இருந்து பெற்றுக் கொடுப்பதில் மிகுந்த ஆர்வம் காட்டிய ஒபாமா, தீவிரவாதத்திற்கு எதிரான பல்வேறு முகமைகளை தனது வெளிநாட்டு சுற்றுப் பயணங்களின் போது வெளிப்படுத்தினார். திரவ எரிபொருட்களின் தரத்தை மேம்படுத்தவும், அதன் மூலம் சுற்றுச் சூழலை காக்கவும் உறுதி பூண்ட ஒபாமா, மாற்று எரிபொருட்களின் தேவையை எப்போதும் ஆதரிப்பவர் ஆவார்.

தனது வெற்றிகரமான அரசியல் பயணத்தில் இன்று வெற்றிக்கு மிக அருகாமையில் இருக்கும் " ஜூனியர் ஒபாமா" கத்ரீனா புயல் பாதிப்புகளை அதனால் ஏற்படும் ஏழ்மை நிலைகளை நீக்கவும், குழுச் சண்டைகளில் இருந்து மக்களைக் காக்கவும் குரல் கொடுத்தார்,

இந்த வெற்றிகளுக்குக் காரணமாக " ஜூனியர் ஒபாமாவின்" அயராத உழைப்பையும், உறுதியையும் சொன்னாலும், உண்மையான இவரது வெற்றிக்குக் காரணம், அன்போடு குடும்பத்தைக் கொண்டு செலுத்தும் " மிகேல்" அம்மையாரையும், (அதாங்க அவருடைய அன்பு மனைவி), அப்பாவுடன் இருக்க வேண்டும் எப்போது அடம் பிடிக்காத பத்து வயதுப் பெண் குழந்தை "மாலியா" மற்றும் ஏழு வயது நிரம்பிய "சாஷா" ஆகியோரையும் சாரும்.

"தொடருட்டும் அவரது பணிகள், உலகம் தழைத்தோங்கும் பாதையில்" என்று நாமும் இந்தக் குடும்பத்தை வாழ்த்தி வரவேற்போம்.

 


Fwd: சேமியா ஐஸ் - சிறுகதை


சேமியா ஐஸ் - சிறுகதை

இன்னும் சற்று வேகமாக ஓட வேண்டும். அடுத்த தெருவிலிருந்து கேட்கிறது மணிச்சத்தம். கையில் வைத்திருக்கும் பிளாஸ்டிக் செருப்பு வியர்வையில் நனைந்துவிட்டது. கைநழுவி விழுந்துவிட்டால் அவ்வளவுதான் என்கிற எண்ணம் எழுந்தவுடன் இறுக்கமாக பிடித்துக்கொண்டு ஓடினேன்.

வெற்றுக்காலுடன் ஓடியதில் முள்ளொன்று குத்தி வலி உயிர்போனது. குனிந்து முள்ளை எடுக்க நேரமில்லை. நொண்டிக்கொண்டே அடுத்த தெருவிற்குள் நுழைந்து மூச்சு வாங்க நின்று பார்த்தேன்.

தூரத்தில் நின்றிருந்தார் முருகேசு அண்ணன். கைகாட்டிக்கொண்டே நொண்டி நொண்டி அவரிடம் சென்றேன்.
பிளாஸ்டிக் செருப்பைஅவரிடம் கொடுத்தேன். வாங்கி பார்த்துவிட்டு சைக்கிள் ஹேண்ட்பாரில் தொங்கிய கோணிப்பைக்குள் போட்டுக்கொண்டார்.

"ஒரு சேமியா ஐஸ் குடுங்கண்ணா" மூச்சுவாங்கிக்கொண்டே சொன்னேன்.

என் கையில் ஐஸ்ஸை தந்துவிட்டு  ஐஸ்வண்டியை தள்ளிக்கொண்டு போய்விட்டார்.

கையில் வாங்கியவுடன், போன வருட கோவில் திருவிழாவில் சேமியா ஐஸ் வாங்க தேவையான ஒரு ரூபாயை சேர்க்க நான் பட்டபாடு  நினைவுக்கு வந்தது.


இரண்டு மைல் தூரம் நடந்து சென்று ஊருக்கு வெளியே இருக்கும் கந்தசாமி அண்ணாச்சி தோட்டத்தின் வேலியோரம் விழுந்துகிடக்கும் நெல்லிக்காய்களை பொறுக்கி, வரும் வழியில் வாய்க்காலில் கழுவியெடுத்து, கோவில் வாசலருகே பழைய பேப்பர் விரித்து நெல்லிக்காய்களை விற்று ஒரு ரூபாய் சேர்த்துதான் சேமியா ஐஸ்வாங்கினேன்.

ரூபாய் இல்லாவிட்டால் கண்ணாடி பாட்டில்,பிளாஸ்டிக் செருப்பு,உடைந்த பிளாஸ்டிக் சாமான்கள் ஏதேனும் கொடுத்தால் ஐஸ் வாங்கலாம்.


உள்ளங்காலில் முள் உறுத்தியது. கையில் வழிகின்ற சேமியா ஐஸ்ஸை விறுவிறுவென்று தின்றுமுடித்து அருகிலிருந்த தெருவிளக்கு கம்பத்தில் சாய்ந்துகொண்டு உடைந்த முள்ளை விரல் நகத்தால் எடுத்தபோது "பளார்" என்று என் முதுகில் ஒரு அறை விழுந்தது.

வலியுடன் திரும்பி பார்த்தால், கண்கள் கோபத்தில் மின்ன,பத்தரகாளி போல் நின்றிருந்தாள் சின்னம்மா.எனக்குத் தெரியும் சின்னம்மாவிடம் சிக்குவேனென்று. ஆனால் இவ்வளவு சீக்கிரம் எதிர்பார்க்கவில்லை.


ஆடுகளுக்கு புல் அறுக்க மட்டும்தான் சின்னம்மா வீட்டை விட்டு வாய்க்கால் ஓர தோட்டத்திற்கு வருவாள். மற்றபடி எப்பொழுதும் அடுப்பங்கரையிலும் ஆட்டுக்காடியிலும்தான் இருப்பாள்.

அவளுக்கு எதற்கு பிளாஸ்டிக் செருப்பு?  சந்தைக்கு அப்பாவுடன் போகும்போதுகூட வெற்றுக்காலுடன் போவதுதான் சின்னம்மாவிற்கு பிடிக்கும். எதற்கும் உபயோகமில்லாத செருப்பால் இன்று ஒரு சேமியா ஐஸ்
என் வயிற்றுக்குள் இருக்கிறது. கூடவே முதுகில் விழுந்த அடியின் வலியும்.

சின்னம்மா கையில் சிக்கினால் வேப்ப மரத்தில் கட்டிவைத்து மிளகாய் பொடியால் அபிசேகம் பண்ணிவிடுவாள்.போன மாதம் கபடி விளையாடிவிட்டு விளக்குவைத்த பிறகு வீட்டிற்கு வந்ததற்கு இரவு இரண்டுமணிவரை வேப்பமரத்துடன் நின்றது நினைவுக்கு வந்தது. செத்தாலும் சின்னம்மாவிடம்  சிக்கக்கூடாது என்று ஓட ஆரம்பித்தேன்.  கொஞ்சதூரம் விரட்டிக்கொண்டு வந்தாள், பின் முடியாமல் இடுப்பில் கைவைத்து நின்று ஏதேதோ கெட்டவார்த்தையால் திட்டிவிட்டு திரும்பி போய்விட்டாள்.

இருட்ட ஆரம்பித்துவிட்டது. பள்ளிக்கூட மைதானத்தில் அமர்ந்திருந்தேன். பசி தாங்கமுடியாமல் வயிறு வலிக்க ஆரம்பித்தது. வீட்டிற்கு போனாலும் சோறு கிடைக்காது. மிளகாய் தூள் மட்டும் இனிப்பாக இருந்தால் எவ்வளவு நன்றாக இருக்கும்? பசியுடன் உறங்ககூடாது என்று பாட்டி சொன்னது ஞாபகம் வந்தது. சரி வருவது வரட்டும் வீட்டிற்கு போய்விடலாம் என்று முடிவெடுத்தேன்.

 
வீட்டை நெருங்க நெருங்க இதயம் துடிக்கும் சத்தம் காதுகளில் கேட்டது. வாசற்கதவை மெதுவாய் திறந்து உள்ளே சென்றேன். தோள்துண்டை சுருட்டி தலைக்கு வைத்து திண்ணையில் படுத்திருந்தார் அப்பா. நல்ல உறக்கத்தில் இருக்கிறார் என்பதை உரத்த குறட்டை சத்தம் சொல்லிற்று.

 
அடுப்பங்கரையின் ஓரத்தில் பாய்விரித்து படுத்திருந்தாள் சின்னம்மா. பக்கத்தில் தங்கச்சி பாப்பா வாயில் கைவைத்தபடியே உறங்கிக்கொண்டிருந்தது. சின்னம்மாவின் தலைக்குமாட்டிலிருந்த சோற்றுப்பானை என்னை கூப்பிடுவதுபோல் இருந்தது.

பூனைபோல் அடிமேல் அடியெடுத்து வைத்து சோற்றுப்பானையில் கைவைத்தேன்.
பானையை மூடியிருந்த அலுமினியத் தட்டு தவறி சின்னம்மாவின் கையில் விழுந்துவிட்டது. சட்டென்று எழுந்தவள் என்ன செய்தாள் என்பதை சொல்லித் தெரியவேண்டியதில்லை.

இரண்டு மணிவரை வேப்பமரத்துடன் இருப்பவன் இன்று ஐந்துமணிவரை வேப்பமரத்தில் ஒண்டியிருந்தேன். பிள்ளையார் கோவில் பாட்டுச்சத்தத்தில் எழுந்துவிட்டேன். அசதியில் நின்றுகொண்டே உறங்குவது பழக்கமான ஒன்றுதான். ஆனாலும் கால்வலி விண் விண் என்றது.

ஐந்துமணிக்கு  சின்னம்மாவின் கெட்டவார்த்தைகளை வாங்கிக்கொண்டபின்னரே என் கட்டுகளை அவிழ்த்துவிட்டார் அப்பா. என்னவோ அறிவுரையெல்லாம் சொல்லியவாறே சோற்றை பிசைந்து ஊட்டினார். அரைப்பானை சோற்றை விழுங்கிவிட்டு திண்ணையில் படுத்துறங்கிவிட்டேன்.

திண்ணை சூடாக ஆரம்பித்த மதிய வேளையில் முழித்து சுவற்றில் பதிந்திருக்கும் கண்ணாடியில் என் முகம் பார்த்தேன். சின்னம்மா அடித்த அடியால் கன்னம் இரண்டும் தக்காளிபோல் சிவந்து வீங்கியிருந்தது.

தூரத்தில் எங்கோ ஐஸ்வண்டிக்காரரின் மணிச்சத்தம் கேட்டதில் மனதில் சேமியா ஐஸின் பிம்பம் பெரியதாய் தோன்ற வீட்டிற்கு வெளியே கிடந்த சின்னம்மாவின் புதுச்செருப்பைக் கண்டு சிரித்து ஆரம்பித்தேன்.

-நிலாரசிகன்.

 --

அள்ளித்தர நட்புடன்,
நிலாரசிகன்.
"தமிழுக்கு நிலவென்று பேர்"
என் கவிதை புத்தகம் வாங்க -->
http://www.anyindian.com/product_info.php?products_id=212001
கவிதைகள் --> http://nilaraseegan.blogspot.com
மழலைகளுக்காக -->http://www.helptolive.org/